میرے پسندیدہ اشعار

 

 میرے پسندیدہ اشعار

موضوع :کتاب

یہ معجزہ بھی اس کی چاہت، ہوسکتاتھا

وہ لفظ بولے تو دل پہ جیسے کتاب اترے

 

ابھی تو چند لفظوں میں سمیٹا ہے تجھے میں نے

ابھی میری کتابوں میں تیری تفسیر باقی ہے

 

وہ   عجب  گھڑی  تھی ،   میں  جس   گھڑی  لیا   درسِ  عشق

کہ کتاب عقل کی طاق میں جوں دھری تھی سو دھری رہی

سراج اورنگ آبادی

 

سرورِ علم ہے کیفِ شراب سے بہتر

کوئی رفیق نہیں ہے کتاب سے بہتر

 

کتابوں  کی  تقدیس  ہے  لاجواب

کتابوں میں شامل ہے  ام  الکتاب

صہبااختر

 

پھوٹتے ہیں ہر لمحہ ان سے روشنیوں کے سرچشمے

تم  کیا  جانو   تم  کیا سمجھو  ان  بوسیدہ  کتابوں  کو

اقبال الرحمن فاروقی

 

مٹادے   اپنی   ہستی  کو   اگرکچھ مرتبہ چاہے

کہ دانہ خاک میں مل کرگل و گلزار ہوتاہے

موضوع:نکتہ

ادائے خاص سے غالبؔ ہوا ہے نکتہ سرا

صلائے عام ہے یاران نکتہ داں کے لئے  

اسداللہ غالب

 

الٰہی  کر مجھے  تو  خاکِ پا  اہلِ  معانی  کا

کہ کھلتا ہے اسی صحبت سے نسخہ نکتہ دانی کا

 

تا ثریا جس نے پھینکی علم و دانش کی کمند

وہ فقیہ و فلسفی وہ نکتہ داں رخصت ہوا

موضوع: مومن

ہاتھ   ہے   اللہ    کا     بندۂ  مومن    کا    ہاتھ

غالب   و   کار آفرین    کارکشاد     کارساز

 

اللہ  کو  پامردئ  مومن  پہ   بھروسا

ابلیس کو  یورپ  کی  مشینوں  کاسہارا

تقدیرِ امم  کیا  ہے کوئی  کہہ نہیں سکتا

مومن کی فراست ہو توکافی ہے اشارا

بقول علامہ محمد اقبال ؒ

 

موضوع: نوری

خاکی   و   نوری     نہاد     بندۂ  مولا     صفات

ہردوجہاں سے غنی اس کادل ہے بے نیاز

 

ہزاروں سال نرگس اپنی بے نوری پہ روتی ہے

بڑی مشکل سے ہوتاہے چمن میں دیدہ ورپیدا

 

 

 

موضوع :جوہر

فطرت  نے  مجھے  بخشے ہیں جوہرِملکوتی

خاکی ہوں مگرخاک سے رکھتا نہیں پیوند

درو یش خدامست نہ شرقی ہے نہ غربی

گھرمیرا  نہ دلی   نہ  صفاہاں نہ سمرقند

علامہ اقبال

 

جوہر میں ہو لاالہ تو کیا خوف

تعلیم   ہو    گو    فرنگیانہ

بقول علامہ محمد اقبال ؒ

 

ادب تعلیم کا جوہرہے زیور ہے جوانی کا

وہی شاگرد ہیں جوخدمت استاد کرتے ہیں

چکبت برج نارائن

 

ہوگیا  تو قبرمیں وہ چرخ ہفتم کی مثال

تیری گردِ راہ جس آئینے کا جوہر ہوئی

سید نظرزیدی

موضوع:سجدہ

کون   سمجھے   گا!  مرے   سرکی  بلندی  کا  عروج

پنج وقتہ!  ترے دربار میں خم ہوتاہے

وہاں پہنچادیا ! صرف ایک ہی سجدے نے مجھے

ذرہ ذرہ جہاں صد رشکِ ارم ہوتاہے

انصارالہ آبادی

 

تومیرے سجدوں کی لاج رکھ لے شعورِ سجدہ نہیں  ہے مجھ کو

یہ  سر  تِرے  آستاں سے پہلے  کسی  کے آگے  جھکا نہیں ہے

رفیق راز

موضوع :موت

ماں کی آغوش میں کل موت کی آغوش میں آج

 ہم کو دنیا میں یہ دو وقت سہانے سے ملے

 کیف بھوپالی

زندگی اک سوال ہے جس کا جواب موت ہے

موت بھی اک سوال ہے جس کا جواب کچھ نہیں

امن لکھنوی 

زندگی اک حادثہ ہے اور کیسا حادثہ

موت سے بھی ختم جس کا سلسلہ ہوتا نہیں

جگر مراد آبادی

نیند کیا ہے ذرا سی دیر کی موت

موت کیا کیا ہے تمام عمر کی نیند

جگن ناتھ آزاد

زندگی کیا ہے عناصر میں ظہور ترتیب

موت کیا ہے انہیں اجزا کا پریشاں ہونا

 

قید حیات و بند غم اصل میں دونوں ایک ہیں

موت سے پہلے آدمی غم سے نجات پاے کیوں

مرزا غالب 

دل کا  میرےسکوں نہیں  آواز وساز میں

ٹھنڈک ہے میری آنکھ  کی لوگو  نماز میں

حافظ محمد رمضان

 

پیارا   ہے    مجھے   بندہ   توّاب    و  مطہر

قرآن کو پڑھ کرعجزمیں سرشار چلاآ 

میں دائروں سے نکل رہاہوں

وہ   دائروں    میں    سما رہا   ہے

 

وہ کائنات سے کیسے کرے گا کسبِ کمال

جو  اپنی  ذات سے باہر نکل نہیں سکتا

سید تابش اَلْو َرِی

 

 

نسل، قومیت،  کلیسا، سلطنت، تہذیب،  رنگ

خواجگین نے خوب چن چن کر بنائے مسکرات

علامہ اقبال

 

شاید سفر ہماراکسی دائرے میں ہے

رستے سے کوئی میل کا پتھرنہیں گیا

 

پستی  کا   کوئی    حد    سے   گزرنا   دیکھے

اسلام    کا    گر    کر    نہ    ابھرنا   دیکھے

مانے نہ کبھی کہ مد  ہے ہر جزر  کے  بعد

دریا     کا     ہمارے     جو     اترنا    دیکھے

الطاف حسین حالی

 

نہیں ہے اوروں کے عیب وخطا پہ میری نظر

میں سر بہ  جَیب  محبت  کی   خانقاہ   میں   ہوں

 

نہ تھی حال کی جب ہمیں اپنے خبر رہے دیکھتے اوروں کے عیب وہنر

پڑی    اپنی   برائیوں   پر جو   نظر    تو    نگاہ    میں    کوئی    برا     نہ   رہا

 

میں اکیلا ہی چلاتھا جانب منزل مگر

لوگ ساتھ آتے گئے اورکارواں بنتاگیا

مجروح سلطان پوری

 

یہ دعا جاتی ہے جذبوں کے پروں سے اڑکر

ہاتھ   تو  اُٹھّیں   مگر  دل   بھی   دعا  تک   پہنچے

منظربھوپالی

 

کر  عطا   اپنا   مجھے شوقِ لقا

دین و دنیا کی خرابی سے بچا

 

سکوں پرستی راہب سے فقر ہے بیزار

فقیر    کا   ہے    سفینہ    ہمیشہ      طوفانی

علامہ اقبال

فلک  کو کیا  خبر  یہ خاکداں کس  کا نشیمن ہے

غرض انجم سے ہے کس کے شبستاں کی نگہبانی

علامہ اقبال

 

یہی  فرزند آدم ہے جس کے اشک خونیں سے

کیا  ہے حضرت یزداں  نے دریاؤں  کو طوفانی

 

 اک مرد فرنگی نے کہا اپنے پسر سے

محکوم کوتیغوں سے نہیں کرتے زیر

تعلیم کے تیزاب میں ڈال اس کی خودی کو

ہوجائے ملائم توجدھر چاہے اسے پھیر

تاثیرمیں اکسیر سے بڑھ کر ہے یہ تیزاب

سونے کا ہمالہ ہوتومٹی کا ہے یہ ڈھیر

بقول علامہ اقبال

ہزاروں سال نرگس اپنی بے نوری پہ روتی ہے

بڑی مشکل سے ہوتاہے چمن میں دیدہ ورپیدا

 

فرشتوں سے بہتر ہے انسان ہونا

مگر اس میں پڑتی ہے محنت زیادہ

 

فطرت  نے  مجھے  بخشے ہیں جوہرِملکوتی

خاکی ہوں مگرخاک سے رکھتا نہیں پیوند

درو یش خدامست نہ شرقی ہے نہ غربی

گھرمیرا  نہ دلی   نہ  صفاہاں نہ سمرقند

علامہ اقبال

 

افریقہ کے دشت وجبل کو جب جب بھی سیراب کیا

علم ویقیں کے بیج بکھیرے  ، پتھروں کومہتاب کیا

 احسن عزیز

 

بڑھایا اس  ادانے  مرتبہ  صدیق اکبر کا

کہ قرباں خدمت دین نبی پر مال و زر ہو

 

کسبِ ہر فن میں ، لگی ہے  شرط  استعداد کی

کب کھلیں سرمہ سے آنکھیں کورِ مادر زاد کی

 

قدر   ظرف   ہر  عاشق    مقام   اپنا   بناتا   ہے

یہ وہ آدابِ محفل ہیں جو سکھلائے نہیں جاتے

 

نگاہِ  گرم  سے پگھلتا ہے یہ

دیکھ یہ آئینہ نہیں دل ہے

 

 

عشرتِ قطرہ ہے دریامیں فناہوجانا

درد کا حد سے گزرنا ہے دوا ہو جانا

اسداللہ خاں غالب

 

طریقت بے شریعت نیست واصل

حقیقت بے طریقت نیست حاصل

 

محبت کے یہ معنی ہیں کہ میں نے

وہی  چاہا  کہ  جو  کچھ  تونے  چاہا

بہادر شاہ ظفر

 

تصوف ہی زباں سے دل میں حق کا نام لایاہے

یہی مسلک ہے جس میں فلسفہ اسلام لایا ہے

اکبرالہ آبادی

 

سفر تمام   ہو  کب  منزلِ  مدینہ  کا

کہ مدتوں سے دیارِ کرم کی راہ میں ہوں

حفیظ الرحمن احسن

 

پہنچی وہیں پہ خاک جہاں کا خمیر تھا

ہوئی حبیب کے پہلو میں خوابگاہ نصیب

مرزا جواں بخت جہاں دار

 

خصوصیت یہ اگر ہے تو یارغار میں ہے

 

علیم خستہ جاں تنگ آگیا ہے درد ہجراں سے

الہی کب وہ دن آئے کہ مہمان محمد ( ﷺ) ہو

 

اے شوق مچل اے پاؤں ٹھہر

اے دل کی  تمنا  خوب تڑپ

 

کیوں نہ مقبول ہو دعائے خلوص

کہ اثر خود  ہے  خاکپائے  خلوص

حسرت موہانی

 

عشق کی ایک جست نے طے کردیا قصہ تمام

اس   زمیں و آسماں کو  بیکراں سمجھتا   تھا  میں

وہی صاحب امروز جس نے اپنی ہمت سے

زمانے  کے  سمندر  سے  نکالا گوہر  فردا

علامہ اقبال علیہ الرحمہ

 

 موت کو سمجھے ہے غافل اختتام زندگی

ہے  یہ  شامِ  زندگی  صبحِ  دوام زندگی

بقول ابن انشا:

 دریابہ حباب اندر،طوفاں بہ سحاب اندر

محشربہ نقاب اندرہوناہوتوایساہو

 

نہ تخت وتاج میں ،نہ لشکروسپاہ میں ہے

جو  بات  مردِقلندر  کی  بارگاہ میں ہے

علامہ اقبال علیہ الرحمہ

 

اے جذبہ دل گر میں چاہوں  ہر  چیز مقابل آجائے

منزل کے لیے دو گام چلوں اور سامنے منزل آجائے

 

ہوگئی    کافور  ساری   ظلمتیں

روشنی ہی روشنی ہے ١٤، اگست

 

خوش  جمال  و خوش  خصال   و غمگسار  و بردبار

تھاپہاڑوں سے بھی بڑھ کر ان کاعزم وحوصلہ

سید خضرحسین

 

دیکھنا    تقریر    کی    لذت   کہ   جو    اس    نے   کہا

میں نے یہ جانا کہ گویا یہ بھی میرے دل میں ہے

اسداللہ خاں غالب

 

لگن ہو جس کے دل میں پہنچ جاتے ہیں منزل تک

حوادث  راستے  میں دام  پھیلایا  ہی   کرتے  ہیں

 

جو یقین کی راہ پہ چل  پڑے،انہیں منزلوں نے پناہ دی

جنہیں وسوسوں نے ڈرادیا،وہ قدم قدم پر بہک گئے

 

وہ بولتاہے تو ایک روشنی سی ہوتی ہے

حکمت وعلم وہنر میں کون ہے ان کی مثال

کوئی    ان   سا   ہے   کہاں ،   عالم    مفکر   پارسا

سید خضرحسین

 

ذاتوں میں خاندانوں میں تقسیم ہوگئے

ہم   مادری   زبانوں  میں   تقسیم ہوگئے

 

وہ  رہنما  ہیں کہ تفریق پر ہے جن کی معاش

ہم ایسے خواب میں بھی امن وآشتی دیکھیں

 

دلوں کے حوصلے بڑھ کر گھٹا نہیں کرتے

پہاڑ   اپنی   جگہ   سے   ہلا   نہیں  کرتے

 

رو  میں  تنکے  کی  طرح  بہنا  تو کچھ مشکل نہیں

بات توجب ہے کہ طوفانوں کے رخ موڑ دے

 

کیا  کبھی  روک بھی  سکتے  ہیں سفر سورج کا

وہ اندھیرے جو اجالوں سے حسد رکھتے ہیں

 

مجھے  غرض  کسی  سے  نہ  واسطہ  مجھے  کام اپنے ہی کام سے

تیرے ذکر سے تیری فکر سے تیرے نام سے تیری یاد سے

 

 

بے ہنروں میں ہیں قابلیت کے نشاں

پوشیدہ ہیں وحشیوں میں اکثرانساں

عاری ہیں لباس تربیت سے ورنہ ہیں

طوسی ورازی انہیں شکلوں میں نہاں

علامہ الطاف حسین حالی

 

جن کے کردار سے آتی ہو صداقت کی مہک

ان کی تدریس سے پتھر بھی پگھل سکتے ہیں

 

تلاطم خود بخود بے تاب رہتاہے سلامی کو

اگر  تیراک  اچھا ہو تو دریا کچھ نہیں کہتا

 

ارادے جن کے پختہ ہوں نظرجن کی خداپرہو

تلاطم خیز موجوں  سے  وہ  گھبرایا نہیں کرتے

 

دل  کو  سکون ،  روح  کو  آرام آگیا

موت آگئی کہ دوست کا پیغام  آگیا

جگر

 

آہ   وہ   عاشق    کلام    اللہ

عالم   و   فاضل   و   ولی  اللہ

دیکھ کس شان سے ہوا رخصت

بر  زباں   لا  الہ   الا  اللہ

 

کوئی یقیں کرے گا اک ایسی عظمت بھی

کبھی تھی حصۂ دنیا  کبھی  تھی جزوِ  جہاں

مجید امجد

 

تبلیغ  سے  بلند  کی  اسلام  کی  شان

تعلیم  کی  شمعیں  بھی  جلائیں ہرآن

پوچھو  کوئی   محرمانِ   علم  دیں   سے

جولاں گہِ علم دیں تھے فضل الرحمن

جناب راغب مراد آبادی

وہ مبلغ تھے  نرالی   شان  کے

  اہلِ  دل  کو  ہے  انہی    کی  جستجو

جانشینِ   حضرتِ  عبدالعلیم

 جن کی شہرت ہے جہاں میں چارسو

دامنِ رحمت میں جاکرسوگئے

 عبدِ   حق   فضلِ   رحماں    آرزو

جناب آرزو اکبر آبادی

 

 

میں آج مرکر بھی بزم وفا میں زندہ ہوں

تلاش  کر مری محفل ، مرامزار نہ پوچھ

 جگرمرادآبادی

 

اللہ اگر توفیق نہ دے انساں کے بس کا  کام نہیں

فیضانِ محبت عام سہی عرفانِ محبت عام نہیں

 

رہ ِ طلب میں ادب ہی سے سرفرازی ہے

مزا   کلیم   سے   پوچھ   برہنہ   پائی  کا

امیر

 

زباں    پہ     بار     خدایا    یہ    کس     کا     نام    آیا

کہ میرے نطق نے بوسے مری زباں کے لئے

 

ادب تعلیم کا جوہرہے زیور ہے جوانی کا

وہی شاگرد ہیں جوخدمت استاد کرتے ہیں

کبت برج نارائن

 

میرکیا سادہ ہیں،بیمارہوئے جس کے سبب

اسی   عطار   کے   لڑکے   سے   دوا  لیتے   ہیں

 

خواب تھا جوکچھ کہ دیکھا  جوسنا افسانہ تھا

بھید کھلتے رہے الجھتے  رہے

ایک الجھن ہے آگہی کیا ہے

 

لوگ دیوانے ہوہی جاتے ہیں

سوچ کر آگہی کے بارے میں

 

مطمئن  اپنے  یقیں پہ  اگر   انسان  ہو جائے

سِر حجابوں میں جو  پنہاں  ہے  نمایاں ہوجائے

 

چوں ہمی گویم مسلمانم  بلازم

کہ  دانم مشکلات لا الہ الا اللہ

 

ہمیں یہ تونے شعور بخشا کہ زندگی بے ہدف نہیں ہے

بشر    کو     بہرِ   کشاکش    امتحان   پیدا  کیا  گیا   ہے

جناب سید گلزار بخاری صاحب

 

بے کار ہو جو بات کوئی چھوڑ دیجئے

        اسلام کایہ حصہ عادت بنائیے

 

دنیا  میں  ہوں  دنیا   کا   طلبگار نہیں ہوں

بازار سے گزرا ہوں خریدار نہیں ہوں

جناب اکبرالٰہ آبادی

 

نہیں چلنے لگی یوں میرے پیچھے

یہ دنیا میں نے ٹھکرائی بہت ہے

وسیم بریلوی

 

راز  ہے  راز  ہے   تقدیر   جہانِ  تگ  و تاز

جوش کردار سے کھل جاتے ہیں تقدیر کے راز

ڈاکٹرعلامہ محمداقبال علیہ الرحمہ

 

جگہ  جی  لگانے کی یہ دنیا نہیں ہے

یہ عبرت کی جا ہے تماشہ نہیں ہے

 

اس شخص کے  اوصاف  کا مشکل ہے احاطہ

یہ   کام   نہیں   اہل  قلم   کے    لئے   آساں

عبدالقیوم طارق

 

ورق   تمام   ہوا   اور  مدح  باقی  ہے 

سفینہ چاہئے اس  بحرِ بیکراں کے لیے

مرزااسداللہ خاں غالب

 

مرمٹے تجھ پہ ہوگیا حاصل

مدعا    اپنی   زندگانی   کا

 

اک کشش ہوتی ہے اسلاف کی جگ بیتی میں

قصہ گو  عہد  گزشتہ  کے  کچھ  افسانے سنا

 فراق

 

 

جب سوچ کو فکروں کی قَبادیتاہوں

الفاظ کو آنکھوں سے دکھادیتاہوں

جوش ملیح آبادی

 

اس قدر عشق نبی ہو کہ مٹادوں خود کو

اس قدرخوف خدا ہو کہ نڈرہوجاؤں

مظفروارثیؒ

 

اوروں کاہے پیام اور میراپیام اور ہے

عشق کے دردمند کا طرزِکلام  اور ہے

علامہ اقبالؒ

 

کیا چیز  مجاہد  ہے  حیران  زمانہ  ہے

درکارانہیں شاید پانی ہے نہ دانہ ہے

 

 

لگے منہ بھی چڑانے دیتے دیتے گالیاں صاحب

زباں  بگڑی   تو  بگڑی تھی  خبر لیجئے   دہن   بگڑا

بقول آتش

 

سربستہ  راز  سرِ بازار کھل گیا

اس نے کیا کلام توکردارکھل گیا

 

سچائی  سمودی   تو   چمکنے  لگی  تحریر

ورنہ تو ہرایک لفظ سیاہی سے لکھاتھا

 

لمحہ لمحہ میرایوں ذوق سفر میں رہنا

اک بہانا ہے زمانے کی خبر میں رہنا

 

میں پھروں ہزار ادھر ادھر نہیں گردو پیش سے بے خبر

میرا  دل  ہے   عہد  جدید  مری  آنکھ  عہد   قدیم  پر

 

تو ہو یہ نورِ بصارت کہ پڑھ لے حرف بحرف

جو     ہوئے     لوحِ    جبین     پر     نوشتۂ    تقدیر

ذوق

 

 

بوجہل جیسے لوگوں سے تبلیغ مت کرو

کھیتی   میاں   فضول   ہے   بنجر   زمین   پر

بقول عثمان مینائی

 

غلام  قوموں   کے   علم و عرفاں   کی   ہے   یہی  رمز  آشکارا

زمیں اگرتنگ ہے توکیاہے،فضائے گردوں ہے بے کرانہ

خبر  نہیں   کیا ہے  نام  اس  کا  خدا فریبی  کہ  خود فریبی

عمل   سے   غافل   ہوا   مسلماں  بناکے  تقدیر  کا   بہانہ

علامہ اقبال

 

خوفِ دوزخ سے کبھی،خواہشِ جنت سے کبھی

مجھ  کو  اس  طرزِ  عبادت  پہ  ہنسی   آتی   ہے

 

خبر    تحیر    عشق    سن    نہ    جنوں   رہا    نہ   پری   رہی

نہ  تو ، تو    رہا ،   نہ  تو  میں  رہا،  جو  رہی  سو  بے  خبری  رہی

 

وائے  ناکامی   متاعِ   کارواں   جاتا رہا

کارواں کے دل سے احساس زیاں جاتارہا

 

صحبت صالح ترا صالح کند

صحبت طالح تر ا طالح کند

 

فلسفہ رہ گیا تلقین غزالی نہ رہی

رہ گئی رسم اذاں روح بلالی نہ رہی

علامہ اقبال

 

حقیقت خرافات میں کھوگئی

یہ امت روایات میں کھوگئی

 

میراث  میں  آئی  ہے  انہیں مسند ارشاد

زاغوں کے تصرف میں عقابوں کے نشیمن

 

اصول بیچ  کے مسند خریدنے  والو

نگاہِ اہلِ وفا میں بہت حقیر ہو تم

 

جو آج صاحب مسند ہیں کل نہیں ہونگے

کرایہ  دار  ہیں  ذاتی  مکان  تھوڑی ہے

جناب راحت اندوری

 

یک ساعت در صحبتے بااولیاء

بہتر از صد سالہ طاعت بے ریاء

مولانا روم علیہ الرحمہ

 

اور  طبقات  میں انسان  بکھر  جائیں  گے

مشورے روز ہواکرتے ہیں زرداروں میں

صبا

 

جفائیں بھی ہیں ،فریب بھی ہیں ،نمود بھی ہے،سنگاربھی ہے

پھر اس  پہ  دعویٰ  حق پرستی  اور اس  پہ یاں اعتبار بھی  ہے

اکبرالہ آبادی

 

بیکراں  ہوتا  نہیں  ، بے  انتہاء  ہوتا نہیں

قطرہ جب تک بڑھ کر قلزم آشنا ہوتانہیں

جگر

 

 

میری فطرت کے ہر پہلو میں روشن ہے چراغ ان کا

دل  ان کا ، روح  ان کی،  جسم  ان کا،  دماغ  ان کا

 

 

میں زمیں کا آدمی ہوں مجھے پیار ہے زمیں سے

فلک پہ رہنے  والے   مجھے  چاہیں یا  نا چاہیں

حبیب جالب

 

ہوں مبارک تجھے عقبیٰ کی بہاریں زاہد

میرے ماتھے پہ تو مرقوم رہی ہے دنیا

قتیل شفائی

 

 

کب ڈوبے گا سرمایہ پرستی کا سفینہ

دنیا  ہے  تیری  منتظر  روز مکافات

علامہ محمد اقبال

 

خرد کو  غلامی سے آزاد کر

جوانوں کو پیروں کا استاد کر

علامہ محمد اقبال

 

حق بات ہے دشوار دروغ آج ہے آسان

بِکتے ہوئے انسان کا خاموش ہے اعلان

ہم دیکھیں تو لالہ وگل خاک بسر ہوں

ہم کہہ دیں تو ویرانہ نظر آئے گلستان

ہم چاہیں تو الو کو ہُما شکل دکھادیں

ہم چاہیں تو کردیتے ہیں ذرہ کو فلک شان

لاریب شہنشاہ دروغ آج ہمیں ہیں

کرتا   ہے    سلام    آج    کہ    شرمندہ      ہے     شیطان

 

یہ حقیقت ہے کہ تو بھی مجتہد تھا وقت کا

تونے   یہ   پیغام   پہنچایا   بہ   اندازِ   دگر

سیدنظرزیدی

 

 

از    خدا      خواہیم      توفیقِ     ادب

بے ادب محروم شداز فضلِ ادب

 

جو ہوپردوں میں پنہاں چشمِ بینا دیکھ لیتی ہے

زمانے   کی  طبیعت   کا   تقاضا  دیکھ   لیتی   ہے

 سید عارف

 

مقامِ مصطفیٰ (ﷺ)ہے سرحدِ ادراک سے آگے

یہ  پیکر   نور  کا   ہے  حرف  کی   پوشاک   سے   آگے

میں  اس  کی  وسعتوں کو لفظ پہناؤں تو کیا، جس کا

زمیں پر  اِک  قدم ہے ،  دوسرا افلاک سے آگے

سید سلمان گیلانی

 

 

نگاہ   رعبِ تجلی   سے   اٹھ   نہیں   سکتی

یہ کیا مقام ہے، میں کس کی بارگاہ میں ہوں

حفیظ الرحمن احسن

 

ہر اک شکست ہے دراصل فتح کی تمہید

شکست کھاکے نہ ہو دل شکستہ وناکام

 

تازه   جہاں  ميں  سنت  آقا   کريں  گے  ہم

جيسا کيا حضور (ﷺ)نے ويسا  کريں گے ہم

آقا     ترا     پيام    جہاں     کو    سنائيں    گے

تيری حديث  پاک   کا   چرچا  کريں   گے ہم

محمد رمضان صاحب

 

خواجۂ یثرب نے جن ذروں کوبخشی آب  و تاب

آشنا    تھا    اُن  سے   تیرا  دیدۂ    بیدار   بھی

تو  بنا   اس   بزم    فاران   کی   عظمت   کا  نقیب

تیری تحریروں میں   دیکھے  ہم  نے  یہ  انوار بھی

سیدنظرزیدی

 

یہ تیری عظمت کہ تونے توڑا طلسم مغرب کی برتری کا

وہ فلسفی تیرے  خوشہ چیں  ہیں وہ  فلسفہ ہے غلام تیرا

سید سلمان گیلانی

 

جس  بشر  کو  تیرا  واسطہ   مل  گیا  اس  بشر  کو  بالآخر  خدا  مل  گیا

اک  زمانہ  تھا  جب  خلق  گمراہ  تھی  تو  اسے  کیا ملا راستہ  مل  گیا

کیا وساطت سے تیری یہ قرآں ملا ، اک خزانہ ہمیں بے بہا مل گیا

ہم  تو تھے بے خبر  اپنی ہی ذات سے تجھ سے پوچھا تو اپنا پتہ مل گیا

 

 

زندگی قطرے کی سکھلاتی ہے اسرار حیات

یہ  کبھی   گوہر  ، کبھی  شبنم ،  کبھی   آنسو

 

بھید کھلتے رہے اورالجھتے رہے

ایک الجھن ہے آگہی کیاہے

جوچاہے کیجئے کوئی سزاتو ہے ہی نہیں

              زمانہ سوچ رہا ہے خداتو ہے ہی نہیں

منظربھوپالی

 

ہوا   خلاف   چلی   تو    چراغ    خوب   جلا

خدابھی ہونے کے کیاکیاثبوت دیتاہے

 

 

ہاں بجا فرش سے عرش کا فاصلہ ،

حد ادراک انساں سے ہے ماورا

سیدسلما ن گیلانی

 

 

معلوم   ہوئی   نہ    کچھ   حقیقت

                        میں کیا ہوں کون ہوں کدھرہوں

اثر

 

ڈھونڈنے والاستاروں  کی  گزرگاہوں کا

اپنے   افکار   کی   دنیا   میں   سفر کر   نہ  سکا

اپنی   حکمت   کے خم   و پیچ  میں الجھاایسا

آج   تک   فیصلۂ   نفع   و  ضرر   کر   نہ   سکا

جس نے سورج کی شعاعوں کوگرفتار کیا

زندگی کی  شب  تاریک  کو سحر کرنہ سکا

علامہ اقبال

 

 

 

باہر   نہ   آسکی  تو  قید   خودی   سے    اپنی

اے عقل بے حقیقت دیکھا شعور تیرا

شاعرِ تصوف  جناب خواجہ میر درد صاحب

 

خود  نہ  تھے جو راہ  پر اوروں  کے ہادی  بن  گئے

کیا نظر تھی جس نے  مردوں کو  مسیحا  کردیا

 

کپڑوں   پر  پیوند  لگے ہیں تلواریں بھی ٹوٹی ہیں

پھربھی دشمن کانپ رہے ہیں آخرلشکرکس کا ہے

 

 

اللہ  کو  پامردئ  مومن  پہ   بھروسا

ابلیس کو  یورپ  کی  مشینوں  کاسہارا

تقدیرِ امم  کیا  ہے کوئی  کہہ نہیں سکتا

مومن کی فراست ہو توکافی ہے اشارا

بقول علامہ محمد اقبال ؒ

 

 

وہ فکر گستاخ جس نے عریاں کیا فطرت کی طاقتوں کو

اسی کی بیتاب بجلیوں سے خطرمیں ہے اس کا آشیانہ

بقول علامہ محمد اقبال ؒ

 

بس  جان  گیا  میں  تری پہچان یہی ہے

تودل میں توآتا ہے سمجھ میں نہیں آتا

اکبرالٰہ آبادی

 

صداقت ہو تو دل سینوں سے کھنچنے لگتے ہیں واعظ!

حقیقت  خود  کو  منوالیتی  ہے   مانی   نہیں  جاتی

 

قوم کیا چیز ہے، قوموں کی امامت کیاہے

اس کو کیا سمجھیں یہ دو رکعت کے امام

 

اُٹھا میں مدرسہ و خانقا ہ سے غمناک

نہ زندگی، نہ محبت، نہ معرفت نہ نگاہ

 

شکایت ہے مجھے یارب! خداوندان مکتب سے

سبق شاہیں بچوں کو دے رہے ہیں خاکبازی کا

 

اور     یہ      اہلِ     کلیسا     کا    نظامِ     تعلیم

ایک سازش ہے فقط دین ومروت کے خلاف

 

خوش تو  ہیں ہم بھی جوانوں کی ترقی سے مگر

لب خنداں سے نکل جاتی ہے فریاد بھی ساتھ

ہم سمجھتے  تھے  کہ لائے  گی  فراغت تعلیم

کیا  خبر تھی کہ  چلا  آئے گا الحاد بھی ساتھ

 

یہ بتانِ عصر ِ حاضر کہ بنے ہیں مدرسے میں

نہ  ادائے   کافرانہ ،  نہ   تراش ِ   آزرانہ

 

جوہر میں ہو لاالہ تو کیا خوف

تعلیم   ہو    گو    فرنگیانہ

 

سخت  باریک  ہیں امراضِ اُمم کے اسباب

کھول  کر  کہیے  تو  کرتا ہے  بیاں  کوتاہی

دینِ شیری میں غلاموں کے امام اور شیوخ

دیکھتے   ہیں   فقط    ایک   فلسفہ    روباہی

علامہ اقبال

 

 

مری تعمیر میں مضمر ہے اک صورت خرابی کی

ہیولیٰ برق خرمن کا،ہے خون گرم دہقاں کا

بقول غالب

 

بڑی مدت میں ساقی بھیجتا ہے ایسا  فرزانہ

بدل  دیتا ہے  جو بگڑا  ہوا   دستورِ میخانہ

 

 

بکشائے پردہ چشمِ حقیقت نمائے را

خود را شناس تا بشناسی خدائے را

 

وہ معزز تھے زمانے میں مسلماں ہوکر

تم  خوار   ہوئے   تارک   قرآں  ہوکر

ڈاکٹر علامہ اقبالؒ

 

متحد تھے ہم  تو  تھے اقوامِ عالم کے امام

منتشرہوکرہوئے بے آبرو اوربے ہنر

 

آپ  ہردور  کی  تاریخ اٹھاکردیکھیں

ظلم جب حد سے گزرتاہے فناہوتاہے

منظربھوپالی

 

سمجھا  ہے  جسے  تو مایوسی وہ صرف کمی ہے ہمت کی

یا ڈوب نہ بحرِ الفت میں یا ترک غم ساحل کردے

 

 

تجھ   کو   سورج    نظر  نہیں  آتا

تیرے ہاتھوں میں لاکردوں کیسے

حافظ محمد رمضان

 

جہاں رہے گا وہاں روشنی لوٹائے گا

خدا کرے  یہ صدا  جگمگائے  آکاش پر

اورروشنی بکھیرے زندگی کے قرطاس پر

 

زندگی ایک تماشا ہے تو روز محشر

اجر کی ساری توقع ہے اداکاری سے

بس پرستش نہیں کرتے ہیں بتوں(لوگوں) کی ورنہ

 کس کو انکار ہے صورت کی پرستاری سے

 شہزاد شرجیل

دلیل منطق نہیں چلے گی

یہ عشق ہے فلسفہ  نہیں ہے

یہ عشق ہے بندگی  سمجھ مت

 تو آدمی ہے خدا نہیں ہے

ڈاکٹر عنبرین حسیب عنبر 

ہم اتنے سادہ ہیں خوش گمانی میں مررہے ہیں

کہ ہم تو کردار ہیں کہانی میں مررہے ہیں

اٹھا کہ آواز قتل ہوتے تو بات بھی تھی

 ستم تو یہ ہے کہ بے زبانی میں مررہے ہیں

ڈاکٹر عنبرین حسیب عنبر 

مخزن علم ہے گنجینۂ گوہرکہیئے

حلم آموز منارٹ کا نیا نام آیا

شرحِ صدرآپ کا ہوجائے جو اس کو پڑھیئے

شارحِ مذہبِ عام سرِ عام آیا

فلسفہ دان ارے نادان توپریشاں کیوں ہے

شانۂ شانہ کشِ گیسوءِ الہام آیا

حافظ محمد رمضان

 

 ضبط سے تکلم تک سب کا سب دھوکہ ہے

دل میں کیا سمایا تھا لب پہ بات آئی کیا

کس کو خوف رسوائی عشق سر کا سودا ہے

جان پر بنے جس کی اس کو جگ ہنسائی کیا

آپ بھر کے لائے  ہوآگ اپنی جھولی میں

دل جلے کہ گھر جاذب عشق میں دہائی کیا

شکیل جاذب

 

کون  بیمار  محبت  ہے  سربزم  جہاں

جوطلب  گار نہیں تیری مسیحائی  کا

 

 

کسی  نے  یہ  بقراط  سے  جا کہ  پوچھا

مرض تیرے نزدیک مہلک ہیں کیا کیا

کہا کوئی  درد  نہیں  زمانے  میں  ایسا

کہ  جس  کی  دوا حق  نے  کی ہو نہ پیدا

مگر  وہ  مرض  جس  کو  آسان   سمجھے

کہے  جو  طبیب  اس   کو   ہذیان  سمجھے

 الطاف حسین حالی

 

 

دل کا  میرےسکوں نہیں  آواز وساز میں

ٹھنڈک ہے میری آنکھ  کی لوگو  نماز میں

حافظ محمد رمضان

کون   سمجھے   گا!  مرے   سرکی  بلندی  کا  عروج

پنج وقتہ!  ترے دربار میں خم ہوتاہے

وہاں پہنچادیا ! صرف ایک ہی سجدے نے مجھے

ذرہ ذرہ جہاں صد رشکِ ارم ہوتاہے

انصارالہ آبادی

 

تومیرے سجدوں کی لاج رکھ لے شعورِ سجدہ نہیں  ہے مجھ کو

یہ  سر  تِرے  آستاں سے پہلے  کسی  کے آگے  جھکا نہیں ہے

رفیق راز

 

پیارا   ہے    مجھے   بندہ   توّاب    و  مطہر

قرآن کو پڑھ کرعجزمیں سرشار چلاآ

مسجدیں سب کو بلاتی ہیں بھلائی کی طرف

آئیں نہ آئیں پکارے تو سبھی جائیں  گے

شکیل اعظمی

 

ہردم ہو ان کی حوصلہ افزائی کاخیال

پُراعتماد ہوں گے یقیناً یہ نونہال

علم اور معرفت کی کریں آپ ان سے بات

حاصل ہو ان کو معرفتِ مقصدِ حیات

حافظ محمد رمضان

 

تونے  جو  مشعلِ شبِ  تاب ہمیں  بخشی  تھی

اپنا خوں دے کے بھی وہ ہم نے جلائے رکھی

آندھیاں آئیں ، بپھرتے ہوئے طوفاں آئے

ہم  نے  لَو  اس  کی  بہرحال  بچائے  رکھی

 

وہ امام عصر و جانِ جہاں رخصت ہوا

مرکز اسلام کا روحِ رواں رخصت ہوا

تا ثریا جس نے پھینکی علم و دانش کی کمند

وہ فقیہ و فلسفی وہ نکتہ داں رخصت ہوا

کون سمجھائے گا ہم کو تیرے اسرار و رموز

اے کلام اللہ ، تیرا ترجماں رخصت ہوا

ہوگئی تاریک راہ علم و عرفاں یک بہ یک

وہ چراغِ نور وہ منزل نشاں رخصت ہوا

عمربھر دیتا رہا جو درس علم وآگہی!

وہ خطیب العصر وہ شعلہ بیاں رخصت ہوا

وہ سراپا کیف و مستی و سراپا درد و سوز

وہ مسیحائے نظر وہ حرزِ جاں رخصت ہوا

جانے کن راہوں میں بھٹکے کاروانِ زندگی

کاروانِ زندگی کا پاسباں رخصت ہوا

چھوڑ کر غازیؔ جہان آگہی کو سوگوار

علم و دانش کی زمین سے آسماں رخصت ہوا